Seje karo kutha/kabupaten, luwih-luwih kang disebut kutha/kabupaten lawas, akeh-akehe padha duwe alun-alun. Mung bedane karo kutha/kabupaten liyane, Ngayogjakarta lan Surakarta padha duwe alun-alun nganti loro. Alun-alun kidul (pengkeran) karo Alun-alun Lor. Siji-sijine cak sekawit wis ditata lan duweni kalungguhan kang ora padha.
Gambarane: tumrap Alun-alun Lor Ngayogjakarta kena diibaratake Sri Sultan kerep bisa sapatemon karo kawulane. Wujude patemonan ing antarane lantaran Pengetan-pengetan Garebeg kang setaune nganti ambal kaping telu: Garebeg Mulud, Garebeg Syawal, Garebeg Besar, perayaan Sekatenan kang karo pasar malemane sok nganti sesasinan.
Jaman wingi para kawula lan Sri Sultan uga bisa bebarengan nyumurupi anane Latihan Watangan lan rampogan prajurit karo macan. Mung wektu iki acara kasebut wis ora dianakake maneh. Upacara Taun Dal, tegese saben sewindu sepisan, Kraton nganakake upacara nyembeleh Kebo Bule mapan ing tengah-tengahe ringin kurung Alun-alun Lor. Acara nyembeleh kebo bule duwe makna kang mambu-mambu pulitik. Kebo Bule diibaratake bangsa kulit putih kang atusan taun njajah bangsa Nusantara. Kebo bule kang disembelih nganti sawulu-wulune dianggo rebutan masarakat petani, kanggo tumbal pesawahane.
Papan tengah-tengahe Alun-alun Lor adhakane uga sok kanggo “pepe” tumrape kawula Ngayogjakarta. Ora narimakake marang keputusan Pengadilan banjur laku “pepe”, nyuwun pengadilan marang Sri Sultan. Cara tembungane saiki “naik banding” marang tataran Pengadilan kang luwih dhuwur. Carane: lungguh sila madhep kidul (Siti Hinggil) kanthi kemul lawon putih. Samangsa entuk timbalan banjur dikeparengake sowan mlebu.
Tamu-tamu kang arep mertamu marang Sri Sultan, lumebune kraton uga ngliwati Alun-alun Lor.
Tratag Pagelaran ing sangarepe Siti Hinggil jaman wingine kagem inspeksine Sri Sultan samangsa ana gladhen resik ngarepake acara garebeg tetelune. Kaya padatan seminggu sadurunge acara resmi Garebeg dianakake gladen reged pitung dina lan gladhen resik sepisan.
Inspeksi prajuritan Sri Sultan HB IX lan VIII nalika isih kiyat nitih kuda dhewe. Nanging bareng wis ketingal ora keduga nitih kuda, inspeksine nitih kereta Kanjeng Kyai Jethayu. Kereta tanpa kusir lan blak-blakan ora nganggo payon. Kusir kereta numpak jaran kang narik kereta Kanjeng Kyai Jethayu. Tratag Pagelaran kidul uga dhasare isih pasir lan payone nam-naman bambu. Mung cagake kang pengkuh kayadene cagak Pagelaran Lor.
Sumber: Majalah Djaka Lodang
No comments:
Post a Comment