Wigatine kalungguhan Alun-alun kidul (Pengkeran) jamane wingi uga sok kanggo nindakake paukuman pidana pati marang sapa kang nedya nglawan lan ngemban kesalahan marang Kerajaan. Paukuman pati uga sok ditindakake ing Mancasan (saka tembung Pancas). Wartane sawise nindaki ukuman pancas, jasade banjur dipetak ing sacedhake kono, Mancasan. Abdi dalem kang nindakake paukuman iki kalebu Abdi Dalem golongan Mertolulutan lan papan pancaosane (piket) ana ing bangsal sangarepe Bangsal Witono Siti Hinggil Lor.
Jalur tengah-tengah Alun-alun Kidul iku uga mujudake jalur utama tumrap jasade Sri Sultan samangsa arep disarekake menyang pasareyan Imogiri. Lakune saka Kemagangan mengidul tekan Tratag Pegalran kidul terus metu tengah-e Rigin kurung tekan Plengkung Gadhing lagi nekuk ngetan nuju Imogiri.
Sri Sultan dhewe samangsa isih ngasta ora bakal tindak menyang njaban Beteng miyos plengkung Gadhing, tekan seprene. Semonoa layon-layon warga Njeron Betengan, yen tilar donya jasade ora bakal diliwatake plengkung Gadhing, senajan kramatane mung ana ing Makam Krapyak, Pugeran utawa Tawangsari Dukuh.
Kahanan Alun-alun Kidul khususe wektu saiki wis akeh bedane karo jaman-jaman wingi sadurunge taun-taun patang puluhan, luwih-luwih salebare wayah surup, wis arang-arang sing wani ngambah kono. Saka kulon alun-alun yen arep menyang wetan alun-alun, Langenastran upamane, trima ngalang sethithik ning slamet. Beda karo saiki, ora awan ora bengi. Yen awan meh kemput mubeng Alun-alun akeh bakul tiban, endi sing warung angkringan, klithikan barang-barang bekas utawa wong-wong tuwa nyambi momong bocah ndelok gajah, bal-balan lan liyane meneh. Yen bengi dodolan angkringan, warung lesehan, kalamangsa wayangan sewengi lan tontonan liyane.
Seje meneh barang langka lan ora ngendi-endi ana, sing disebut “Mas Angin”, saka tembung wutuhe “Masuk Antar Beringin”. Ora ana dina lowong. Saben bengi, ora enom ora tuwo, ora lanang ora wadon, kepara wong-wong manca (turis-turis asing) ana sing ketarik melu-melu nyoba “Mas Angin”.
Sajrone suwasana peteng (bengi) mripate diblebet kain ireng, saka jarak 30 meteran saka ringin kurung nyoba mlaku mengidul nrobos longkangan antarane ringin kurung kekarone sing ambane mung wetara rolas meteran. Sing arep nyoba wis diprenahake bakal bisa metu tengah-tengahe longkangan, alon-alon mlaku ngidul. Ngarepake tekan ngarep longkangan kang kudu dirobos, malah nggiwar-nggiwar, ana sing banjur ngetan, ana sing ngulon, malah ana sing setengah balik ngalor.
Ana turis manca, ditakoni kok nyasar. Jawabane kayane ngarepe mau ana blumbang, mula mlipir-mlipir. Lan ana sing krasa yen awake krasa anget-anget, sajake ana barang kobong mula njur salin dalan. Wangsalane sing jare ora bisa nembus pancen werna-werna. Ana sawenehing lomba Mas Angin , tau klakon jare sing menang malah bocah cilik enem taunan. Sing padha weruh komentare werna-werna. Ana jare sing ngomentari bocah durung duwe dosa, mesthi bisa nrobos.
Sumber: Majalah Djaka Lodang
No comments:
Post a Comment